Leikfélag Húsavíkur 

Leikfélag Húsavíkur sýndi verkið Ávaxtakörfuna núna á vordögum. Verkið er eftir Kristlaugu Maríu Sigurðardóttur og tónlistin er samin af Þorvaldi Bjarna Þorvaldssyni. Margir þekkja Ávaxtakörfuna þar sem aðeins ávextir mega búa en þó leyfist einu litlu jarðarberi að dvelja þar, með því skilyrði að sjá um að allt sé hreint og fínt í körfunni. En þegar gulrót birtist allt í einu í körfunni fer allt á annan endann.

Alls tóku níu leikarar þátt í sýningunni og fjögurra manna hljómsveit. Þarna voru á ferðinni bæði þaulreyndir leikarar og tónlistarmenn og aðrir sem stigu sín fyrstu spor á sviðinu í gamla Samkomuhúsinu. Leikstjórinn, Valgeir Skagfjörð vann með Leikfélagi Húsavíkur í fyrsta sinn. Frumsýning var laugardaginn 4. mars.